ଘରେ ପ୍ରସ୍ତୁତ କରନ୍ତୁ ଟେଷ୍ଟି ଟେଷ୍ଟି ଦହି ଆଳୁ ମସଲା ।
ଆବଶ୍ୟକ ସାମଗ୍ରୀ:
ଆଳୁ, ଦହି, ପିଆଜ, ଲଙ୍କା, ଅଦା, ଶୁଖିଲା ଲଙ୍କା, ଗୋଲ ମରିଚ, ଘିଅ ,ଜିରା, ଭୃସୁଙ୍ଗ ପତ୍ର, ରସୁଣ ବଟା, ହଳଦୀ, ଲୁଣ, ଓ ଧନିଆ ପତ୍ର।
ପ୍ରସ୍ତୁତି ପ୍ରଣାଳୀ:
ପ୍ରଥମେ ଆଳୁରୁ ଚୋପା ଛଡ଼ାଇ ଲୁଣ ପାଣିରେ ସିଝାନ୍ତୁ। ଆଳୁ ସିଝିଯିବା ପରେ ୪ ପିସ୍ କରି କାଟି ଦିଅନ୍ତୁ। ଅନ୍ୟ ଏକ ପାତ୍ରରେ ଦହି ଫେଣ୍ଟି ରଖନ୍ତୁ। ଏହା ସହ ଅଦା, ଲଙ୍କା, ପିଆଜ କଟା, ଶୁଖିଲା ଲଙ୍କା ଓ ଗୋଲ ମରିଚ ଗୁଣ୍ଡ କରି ରଖନ୍ତୁ। ତା’ପରେ କଡେଇରେ ଘିଅ ଗରମ କରି ସେଥିରେ ଜିରା, ଭୃସୁଙ୍ଗ ପତ୍ର ପକାଇ ଫୁଟାନ୍ତୁ।
ଏହାପରେ କଟା ପିଆଜ, ଅଦା ଓ କଟା ଲଙ୍କା ପକାଇ ପିଆଜ ନରମ ହେବା ଯାଏଁ ଭାଜନ୍ତୁ। ତା’ପରେ ରସୁଣ ବଟା ପକାଇ ୫ରୁ ୬ମିନିଟ୍ ପର୍ଯ୍ୟନ୍ତ କଷନ୍ତୁ। ମସଲା କଷି ହୋଇଯିବା ପରେ ଆଳୁ ଓ ଦହି ପକାଇ ଫୁଟିବାକୁ ଛାଡି ଦିଅନ୍ତୁ। ଏହା ଫୁଟିଯିବା ପରେ ଶେଷରେ ଲଙ୍କା ଓ ଗୋଲମରିଚ ଗୁଣ୍ଡ ପକାଇ ଗୋଳାଇ ଦିଅନ୍ତୁ। ତାପରେ ସେଥିରେ ଧନିଆ ପତ୍ର ପକାଇ ପରଷନ୍ତୁ ଗରମ ଗରମ ଦହି ଆଳୁ ତରକାରୀ।ଆପଣ ଚାହିଁଲେ ଝୋଳ ରଖି ପାରିବେ ନଚେତ କଷା ହେଲା ଭଳି ବା ଶୁଖିଲା ରଖିପାରିବେ।
