ହଲିଉଡ୍ ସୁପରଷ୍ଟାର ଲିଓନାର୍ଡୋ ଡି କେପ୍ରିୟୋ ଅନେକ ସମୟରେ ପରିବେଶ ଜନିତ ସମସ୍ୟାକୁ ନେଇ ନିଜର ସ୍ୱର ଉତ୍ତୋଳନ କରିଥାନ୍ତି । ବର୍ତ୍ତମାନ ଭାରତରେ ଜଳ ସଂକଟ ଏକ ବଡ଼ ସମସ୍ୟା ପାଲଟିଥିବା ବେଳେ ଏ ନେଇ ଟୁଇଟ୍ କରି ନିଜର ଚିନ୍ତା ଜାହିର କରିଛନ୍ତି ଲିଓନାର୍ଡୋ । ଖାସ୍ କରି ଚେନ୍ନାଇର ପରିସ୍ଥିତି ଦେଖି ସେ ସହରକୁ କେବଳ ବର୍ଷା ହିଁ ବଞ୍ଚାଇ ପାରିବ ବୋଲି କହିଛନ୍ତି ।
ଲିଓନାର୍ଡୋ ଇନ୍ଷ୍ଟାରେ ଏକ ଫଟୋ ସେୟାର କରିଛନ୍ତି, ଯେଉଁଥିରେ ପାଖାପାଖି ଶୁଖି ଯାଇଥିବା କୂଅରୁ ମହିଳାମାନେ ପାଣି କାଢ଼ୁଥିବା ଦେଖା ଯାଇଛି । ଫଟୋକୁ ସେୟାର କରି କ୍ୟାପ୍ସନରେ, କେବଳ ବର୍ଷା ହିଁ ଚେନ୍ନାଇକୁ ଏଭଳି ପରିସ୍ଥିତିରୁ ବଞ୍ଚାଇ ପାରିବ । କୂଅ ସଂପୂର୍ଣ୍ଣ ଶୁଖି ଯାଇଥିବା ବେଳେ ସହରର ଲୋକ ବିନା ପାଣିରେ ବଞ୍ଚୁଛନ୍ତି । ଲୋକମାନଙ୍କୁ ସରକାରଙ୍କ ତରଫରୁ ମିଳୁଥିବା ପାଣି ଟାଙ୍କି ଆଗରେ ଘଣ୍ଟା ଘଣ୍ଟା ଲାଇନ ଲଗାଇ ଠିଆ ହେବାକୁ ପଡ଼ୁଛି । ପାଣି ଅଭାବ ପାଇଁ ଅନେକ ହୋଟେଲ ଏବଂ ରେସ୍ତୋରାଁକୁ ଅସ୍ଥାୟୀ ଭାବେ ବନ୍ଦ କରି ଦିଆଯାଇଛି । ପରିସ୍ଥିତିକୁ ଦେଖି ଏବେ ଲୋକେ ବର୍ଷାକୁ ଚାତକ ପରି ଅନାଇ ବସିଛନ୍ତି ବୋଲି ଲେଖିଛନ୍ତି ଲିଓନାର୍ଡୋ ।