ଦେଶର ସଫଳ ନାରୀଙ୍କ କଥାକୁ ସାମ୍ନାକୁ ଆଣିବେ କେନ୍ଦ୍ର ସରକାର । ବିଭିନ୍ନ କ୍ଷେତ୍ରରେ ଏମାନଙ୍କୁ ମିଳିଥିବା ସଫଳତା, ଉପଲବ୍ଧି କଥା ଜାଣିବ ପୂରା ଦେଶ । ଦିୱାଲୀ ମୌକାରେ ଦେଶର ମା, ଭଉଣୀ, ଝିଅଙ୍କ ସଫଳତାର କାହାଣୀ ଜଣେଇବା ପାଇଁ ମୋଦି ସରକାର ନୂଆ ଅଭିଯାନ ଆରମ୍ଭ କରିଛନ୍ତି । ‘ଭାରତ ର ଲକ୍ଷ୍ମୀ’ ରହିଛି ଏହି ଅଭିଯାନର ନାଁ । ବଲିଉଡ ନାୟିକା ଦିପିକା ପାଦୁକୋଣ ଏବଂ ୱାଲ୍ଡ ବ୍ୟାଡମିଂଟନ ଚାମ୍ପିୟନ ପିଭି ସିନ୍ଧୁ ଏହି କ୍ୟାମ୍ପେନର ମୁଖ୍ୟ ପ୍ରଚାରକ ଦାୟିତ୍ୱ ତୁଳାଉଛନ୍ତି ।
ନିକଟରେ ଆସିଛି ଭାରତର ଲକ୍ଷ୍ମୀର ପ୍ରଥମ କ୍ୟାମ୍ପେନ ଭିଡିଓ । ଯେଉଁଥିରେ ଉଭୟ ସେଲିବ୍ରେଟି ଭାରତ ଲକ୍ଷ୍ମୀ ଅଭିଯାନ ପାଇଁ ପ୍ରଚାର କରିବା ସହ ଦେଶବାସୀଙ୍କୁ ଗୋଟେ ଅପିଲ କରିଛନ୍ତି । ବିଭିନ୍ନ କ୍ଷେତ୍ରରେ ନିଜ ନିଜର ପାରଦର୍ଶିତା ଦେଖାଥିବା, ନୂଆ କିଛି ଉପଲବ୍ଧି ପାଇଥିବା, ସଫଳତା ଆଣିଥିବା ଦେଶରେ କୋଣ ଅନୁକୋଣରେ ରହିଥିବା ସମସ୍ତ ମହିଳାଙ୍କୁ ସାମ୍ନାକୁ ଆଣିବା ପାଇଁ ଅପିଲ କରାଯାଇଛି । ଦିୱାଲି ଅବସରରେ ମହିଳା ସଂଶକ୍ତିକରଣକୁ ଅଧିକ ଗୁରୁତ୍ୱ ଦେଇ କେନ୍ଦ୍ର ସରକାର ଏହି ଅଭିଯାନ ଆରମ୍ଭ କରିଛନ୍ତି । ଭିଡିଓକୁ ପ୍ରଧାନମନ୍ତ୍ରୀ ମୋଦି, ନାୟିକା ଦିପିକା ପାଦୁକୋଣ, ଷ୍ଟାରଖେଳାଳି ପିଭି ସିନ୍ଧୁ ଟୁଇଟର ପେଜରେ ପୋଷ୍ଟ କରିଛନ୍ତି ।
India’s Nari Shakti epitomises talent and tenacity, determination and dedication.
Our ethos has always taught us to strive for women empowerment.
Through this video, @Pvsindhu1 and @deepikapadukone excellently convey the message of celebrating #BharatKiLaxmi. https://t.co/vE8sHplYI3
— Narendra Modi (@narendramodi) October 22, 2019
ମୋଦି ଲେଖିଛନ୍ତି ଭାରତୀୟ ନାରୀଙ୍କ ଶକ୍ତି ହେଉଛି ପ୍ରତିଭା, କଠୋର ତପସ୍ୟା, ଦୃଢ ସଂକଳ୍ପ ଓ ସର୍ମପଣର ପ୍ରତିକ । ସେଭଳି ପିଭି ସିନ୍ଧୁ କହିଛନ୍ତି ସମାଜ ସେତେବେଳେ ଆଗକୁ ବଢେ ଯେବେ ମହିଳା ଅଧିକ ସଶକ୍ତ କରାଯାଏ, ସେମାନଙ୍କ ପ୍ରତିଭାକୁ ସାମ୍ନାକୁ ଅଣାଯାଏ ଓ ଉପଲବ୍ଧିକୁ ସମ୍ମାନ ଜଣାଯାଏ । ମୋଦିଙ୍କ ଭାରତଲକ୍ଷ୍ମୀ ଅଭିଯାନକୁ ସମର୍ଥନ ଜଣାଇ ଦିପିକା କହିଛନ୍ତି ଏଥରକ ଦିୱାଲୀକୁ ଅଧିକ ଆଲୋକିତ କରୁନ୍ତୁ ଦେଶର ମହିଳାଙ୍କ ଯୋଗଦାନକୁ ସେଲିବ୍ରେଟ କରନ୍ତୁ । ମୋଦି ସରକାରଙ୍କ ଏହି ଅଭିଯାନ ଜରିଆରେ ମହିଳାଙ୍କ ପ୍ରତି ସମ୍ମାନ ବୃଦ୍ଧି ସହ ସେମାନଙ୍କ ସୁରକ୍ଷାଦିଗରେ ଅଧିକ ଜାଗ୍ରତ କରିବାକୁ ଅପିଲ କରାଯାଇଛି ।
