ପ୍ରଥମଥର ପାଇଁ ଏହି ଅଭିନେତ୍ରୀଙ୍କ ସହିତ ସ୍କ୍ରିନ ସେୟାର କରିବେ ଅରିନ୍ଦମ, ଜାଣନ୍ତୁ କ’ଣ ରହିଛି ଫିଲ୍ମର ଟାଇଟଲ

ଶିଶୁ କଳାକାରରୁ ନାୟିକା ବନିଥିବା ଶିବାନୀଙ୍କୁ ମିଳିଛି, ଆଉ ଏକ ନୂଆ ସିନେମା । ଏହି ସିନେମାରେ ତାଙ୍କୁ ବାବୁସାନ ଓ ଅନୁଭବଙ୍କ ପରେ ଆଉ ଜଣେ ଲୋକପ୍ରିୟ ନାୟକଙ୍କ ସାଥ୍ ମିଳିଛି । ଏହି ନାୟକ ଜଣକ ହେଲେ ଅରିନ୍ଦମ । ଏଠାରେ ଯେଉଁ ସିନେମାର କଥା କୁହାଯାଉଛି, ତା’ର ଟାଇଟଲ୍ ରହିଛି ‘ଭାଇ’ । ଏଥିରେ ପ୍ରଥମ ଥର ପାଇଁ ଦର୍ଶକ ଅରିନ୍ଦମ-ଶିବାନୀଙ୍କ ଯୋଡ଼ିକୁ ଦେଖିବାକୁ ପାଇବେ ପରଦା ଉପରେ ‘ଭାଇ’ର ନିର୍ଦ୍ଦେଶନା ଦେଉଛନ୍ତି ଜଣାଶୁଣା ନିର୍ଦ୍ଦେଶକ ତାପସ ସରଘରିଆ । ଏଥିରେ ଟାଇଟଲ୍ ରୋଲରେ ଅଛନ୍ତି ବରିଷ୍ଠ ଅଭିନେତା ମିହିର ଦାସ । ଏହି ଫିଲ୍ମରେ ସଂଳାପ ଲେଖିଛନ୍ତି ଦେବୀଦତ୍ତ ମହାନ୍ତି ଓ ସନ୍ତୋଷ ନାରାୟଣ ଦାଶ । ମଳୟ ମିଶ୍ର ଏହାର ସଙ୍ଗୀତ ନିର୍ଦ୍ଦେଶକ ।

ଓଲିଉଡ ପରଦାରେ ବେଶ୍ କିଛି ମାସ ହେବ ନାୟକ ଅରିନ୍ଦମଙ୍କୁ କୌଣସି ଫିଲ୍ମରେ ଦେଖିବାକୁ ମିଳିନାହିଁ । ଚଳିତ ବର୍ଷ ଏ ଯାଏଁ ତାଙ୍କର ଗୋଟିଏ ବି ସିନେମା ରିଲିଜ୍ ହୋଇନାହିଁ । ତାଙ୍କ ଅଭିନୀତ ତଥା ମୁକ୍ତି ପ୍ରତୀକ୍ଷିତ ଶେଷ ଓଡ଼ିଆ ସିନେମା ହେଲା ‘ଇଶ୍କ ପୁଣି ଥରେ’ । ଗତ ବର୍ଷ ଗଣେଶ ପୂଜା ଅବସରରେ ମୁକ୍ତିଲାଭ କରିଥିବା ଏହି ସିନେମାରେ ଅରିନ୍ଦମଙ୍କ ବିପକ୍ଷରେ ନାୟିକା ବନିଥିଲେ ଏଲିନା ।

ଶିବାନୀଙ୍କର ଇତିମଧ୍ୟରେ ଦୁଇଟି ଓଡ଼ିଆ ସିନେମା ରିଲିଜ୍ ହୋଇସାରିଛି । ନାୟିକା ଭାବେ ଶିବାନୀଙ୍କ ପ୍ରଥମ ଓଡ଼ିଆ ଛବି ହେଲା ‘ସିଷ୍ଟର ଶ୍ରୀଦେବୀ’ । ଏଥିରେ ବାବୁସାନଙ୍କ ବିପକ୍ଷରେ ନାୟିକା ଭୂମିକାରେ ନଜର ଆସିଥିଲେ ଶିବାନୀ । ଏହା ପରେ ଶିବାନୀଙ୍କୁ ଅନୁଭବଙ୍କ ବିପକ୍ଷରେ ଦେଖିବାକୁ ମିଳିଥିଲା । ଫିଲ୍ମ ‘ପ୍ରେମ କୁମାର’ ପରେ ଏବେ ଶିବାନୀଙ୍କର ଅନ୍ୟ ଏକ ସିନେମା ରିଲିଜ୍ ଅପେକ୍ଷାରେ ରହିଛି । ଏହାର ଟାଇଟଲ୍ ହେଲା ‘ଦିଲ୍ ମୋର ମାନେନା’ । ଏହି ରୋମାଣ୍ଟିକ ଫିଲ୍ମରେ ଶିବାନୀ ୟଙ୍ଗ ସେନସେସନ୍ ସ୍ୱରାଜଙ୍କ ଅପୋଜିଟରେ ନଜର ଆସିବେ ।