ଲିଙ୍ଗୀୟ ମତଭେଦ ଦୂର କରିବା ପାଇଁ ବ୍ରିଟେନର ଏକ ସ୍କୁଲର ଅଭିନବ ପ୍ରୟାସ, ଛାତ୍ରମାନଙ୍କୁ ସ୍କର୍ଟ ପିନ୍ଧିବା ପାଇଁ ମିଳିଲା ଅନୁମତି
ସ୍କୁଲ ଗୁଡିକରେ ଲିଙ୍ଗୀୟ ମତଭେଦ ଦୂର କରିବା ପାଇଁ ବ୍ରିଟେନରେ ଏକ ବଡ ନିଷ୍ପତି ନିଆଯାଇଛି । ବ୍ରିଟେନର ଏକ ନାମି ବୋର୍ଡିଂ ସ୍କୁଲରେ ବର୍ତ୍ତମାନ ଛାତ୍ରମାନଙ୍କୁ ମଧ୍ୟ ସ୍କର୍ଟ ପିନ୍ଧି ସ୍କୁଲ ଯିବା ପାଇଁ ଅନୁମତି ମିଳିଛି । ରଟଲ୍ୟାଣ୍ଡର ‘ଓପିଙ୍ଗମ’ ସ୍କୁଲର ହେଡଟିଚର କହିଛନ୍ତି ଯେ ଯଦି କେହି ଛାତ୍ର ସ୍କର୍ଟ ପିନ୍ଧିବା ପାଇଁ ଇଚ୍ଛା ପ୍ରକାଶ କରେ ତେବେ ସେ ଏହାକୁ ପିନ୍ଧି ପାରିବେ ।
ବର୍ଷକୁ ୩୩ ଲକ୍ଷ ଫିସ ନେଉଥିବା ଏହି ବୋର୍ଡିଂ ସ୍କୁଲରେ ୧୯୭୩ ମସିହାରେ ପ୍ରଥମ ଛାତ୍ରୀଙ୍କୁ ଆଡମିଶନ ଦିଆଯାଇଥିଲା । ବର୍ତ୍ତମାନ ଏହି ସ୍କୁଲରେ ଉଭୟ ପୁଅ-ଝିଅ ପଢୁଛନ୍ତି । ଖବର ଅନୁସାରେ ଏହା ପୂର୍ବରୁ ମଧ୍ୟ ଲିଙ୍ଗୀୟ ମତଭେଦ ଦୂର କରିବା ପାଇଁ ସ୍କୁଲରେ ଛାତ୍ର-ଛାତ୍ରୀଙ୍କ ବଦଳରେ ପୁପିଲ ଶବ୍ଦର ବ୍ୟବହାର ଆରମ୍ଭ କରାଯାଇଥିଲା ।
ନିକଟରେ ଟିଭି ଆକ୍ଟର ଏବଂ ‘ଓପିଙ୍ଗମ’ ସ୍କୁଲରେ ୩ ବର୍ଷ ପଢିଥିବା କ୍ରିଶ୍ଚିୟନ ଜେସେନ କହିଛନ୍ତି ଯେ ପୂର୍ବରୁ ଯଦି ସ୍କୁଲରେ ସ୍କର୍ଟ ପିନ୍ଧିବାର ଅନୁମତି ମିଳିଥାନ୍ତା ତେବେ ସେ ନିଶ୍ଚିତ ଭାବେ ଏହାକୁ ପିନ୍ଧି ଯାଇଥାନ୍ତେ । ଏହା ସହିତ ଏହି ସ୍କୁଲରେ ହେଡଟିଚର କହିଛନ୍ତି ଯେ ‘ମୁଁ ଆଶା କରୁଛି ପୁପିଲ ମୋ ପାଖକୁ ଆସି କହିବେ ମୁଁ ସ୍କର୍ଟ ପିନ୍ଧିବା ପାଇଁ ଚାହୁଁଛି । ଏବଂ ଆମେ ଏହାକୁ ନିଶ୍ଚିତ ମଞ୍ଜୁରୀ ଦେବୁ ।’
