ପୁଣିଥରେ ଏକାଠି ହେବେ କପିଲ ଶର୍ମା ଏବଂ ସୁନିଲ ଗ୍ରୋଭର ।
କପିଲ ଶର୍ମା ଏବଂ ସୁନିଲ ଗ୍ରୋଭରଙ୍କ ବିବାଦ ପରେ ଦ କପିଲ ଶର୍ମା ଶୋ ବନ୍ଦ ହୋଇ ଯାଇଥିଲା । ପରେ ପରେ କପିଲ ଡିପ୍ରେସନକୁ ଚାଲି ଯାଇଥିଲେ । ଯାହାର ବହୁ ଦିନ ପରେ ସେ ପୁଣିଥରେ ପରଦାକୁ ଫେରିଥିଲେ,କିନ୍ତୁ ତାହା ସଫଳ ହୋଇ ପାରିନଥିଲା । ଅନ୍ୟ ପକ୍ଷରେ ସୁନିଲ ଗ୍ରୋଭର ଯଦିଓ ନିଜର ଅନ୍ୟ ଏକ ଶୋ ଆରମ୍ଭ କରିଥିଲେ ତାହା ମଧ୍ୟ ସଫଳତା ପାଇପାରି ନଥିଲା । ଏହି ସମସ୍ତ କଥାକୁ ଅନୁଧ୍ୟାନ କଲେ ନିହାତି ଭାବରେ ଆପଣ ଜାଣି ପାରୁଥିବେଯେ ଜଣକ ବିନା ଅନ୍ୟ ଜଣକ ଶୋ ତିଷ୍ଠିବା ଅସମ୍ଭବ । ଖବର ଅନୁସାରେ ଦୁଇ ଜଣ ପୁଣିଥରେ ଏକା ସାଙ୍ଗରେ ଟିଭି ପରଦାରେ ନଜର ଆସିବେ ଦର୍ଶକଙ୍କ ମନୋରଂଜନ କରିବା ପାଇଁ ।
ସୂଚନା ଅନୁସାରେ, କପିଲ ଶର୍ମା ଓ ସୁନିଲ ଗ୍ରୋବରଙ୍କ ମଧ୍ୟରେ ପୁଣି ଥରେ ବନ୍ଧୁତା ହୋଇଯାଇଛି । ଡିସେମ୍ବର ୧୬ରୁ ଶୋ’ର ସୁଟିଂ ଆରମ୍ଭ ହେବାକୁ ଯାଉଛି। ବଲିଉଡର ଦବଙ୍ଗ ଖାନ୍ ସଲମାନ ଦୁହିଁଙ୍କ ମଧ୍ୟରେ ବନ୍ଧୁତା କରାଇ ଦେଇଛନ୍ତି ବୋଲି ଖବର ମିଳିଛି।
ସେ କପିଲ ଓ ସୁନିଲଙ୍କ ସହିତ ଆଲୋଚନା କରିଥିଲେ। ଏହାପରେ ଦୁହେଁ ଏକାସାଙ୍ଗରେ କାମ କରିବାକୁ ରାଜି ହୋଇଗଲେ। ସଲମାନଙ୍କ ପ୍ରଡକ୍ସନ ହାଉସ କପିଲଙ୍କ ଶୋ’କୁ ପ୍ରୋଡ୍ୟୁସ୍ କରିବାକୁ ଯାଉଛି। ଅନ୍ୟପଟେ, ସଲମାନଙ୍କ ଅପକମିଂ ଫିଲ୍ମ ‘ଭାରତରେ’ ମଧ୍ୟ ସୁନିଲ କାମ କରୁଛନ୍ତି। ଏ ଭିତରେ ସଲମାନ୍ ଉଭୟଙ୍କ ମଧ୍ୟରେ ପ୍ୟାଚ୍ ଅପ୍ କରାଇଦେଇଛନ୍ତି।
ଉଲ୍ଲେଖଯୋଗ୍ୟ, ଫ୍ଲାଇଟରେ ଝଗଡା ହେବା ପରେ କପିଲଙ୍କ ଶୋ’ରୁ ବାହାରି ଯାଇଥିଲେ ସୁନିଲ। ପରେ କପିଲ ମଧ୍ୟ ଶୋ’କୁ ବେଶି ଦିନ ଆଗକୁ ବଢ଼ାଇପାରି ନ ଥିଲେ। ତେବେ ଦୁହିଁଙ୍କ ପ୍ୟାଚ୍ ଅପ୍ ପରେ ଏବେ ପୁଣିଥରେ ଏହି କମେଡି ଷ୍ଟାରଙ୍କୁ ଏକା ସାଙ୍ଗରେ ଦେଖିବାକୁ ଅପେକ୍ଷା କରିଛନ୍ତି ଦର୍ଶକ।